Моделот FX е најмладиот од низата на компанијата Chery и како таков својот фокус го насочува кон помладата урбана публика која непрестанато трага по возило со изразен дизајнерски „стајлинг“, напредна технологија и иновативни решенија.
Кинеските авто производители „созреаа“ за далеку пократок временски период од колку што им требаше на јапонските или корејските марки. Времето на копирање и користење туѓи технологии е веќе далечно минато. Конкурентноста на автомобилите што доаѓаат од Кина повеќе не ја прави само поволната цена, туку и она што се добива за вложеното. Компанијата Chery е една од првите која го пробива патот на европскиот континент, со намера да се наметне како бренд што може да ја промени играта, а за тоа голема улога игра авангардниот кросовер FX.
По свои правила
Еден од главните аспекти на Chery FX, секако е неговиот впечатлив екстериер. Обликот е инспириран од концептот „уметност во движење“ со кој се истакнува неговата впечатлива и авангардната линија со исклучителен стил. Воедно, преку него се сплотува естетиката и функционалноста на несекојдневно хармоничен начин во футуристички кросовер модел кој не може да помине незабележан. На предниот дел доминантна улога игра масивната предна решетка со тридимензионален облик во дијамантски терк над чии крајни рабови се сместени тенките дневни светла. Светлосните групи се одвоени и се сместени подолу во маската. Силуетата го открива слегувачкиот-лебдечки покрив што е задолжен за трендовскиот „купе“ облик и неколку црвени елементи кои го подигаат визуелниот ефект.
На задниот дел погледот го привлекува големиот спојлер кој е изведен во две нивоа. Дизајнерскиот тим и тука е играл со колоритот, горниот дел е изведен во сјајна црна боја, додека понискиот дел е акцентирана со црвена нијанса. Од кој било агол, Chery FX е визуелно впечатливо возило кое привлекува големо внимание, иако не ги следи „правилата на игра“ што ги поставија некои од неговите ривали несомнено изгледа динамично, особено во двобојна комбинација на надворешноста како што е и тестираниот примерок.
Прецизно, уредно, напредно
Во внатрешноста Chery FX продолжува со истата комбинација на стил и функционалност која е применета и на надворешноста. Интериерот е исклучително добро и модерно дизајниран, а се забележува и големото внимание посветено на деталите и квалитетот на употребените материјали. Овде, оние со остро око ќе ги забележат дизајнерските потези кои прецизно ги следат луксузените автомобилски брендови. Показателелот доаѓа во форма од 10,25 инчен екран на допир задолжен за „инфотејмнет системот“ и 10,25 инчен дигитален кластер пред возачот. Екраните со висока резолуција се интегрирани во една целина и го дополнуваат авангардниот дизајн што треба да обезбеди одредена индивидуалност.
Во делот од новите технологии се и двете позиции на централниот гребен за одлагање на мобилните телефони кои во исто време овозможуваат и нивно безжично полнење. Поврзувањето со системот е без употреба на кабли, а пресликувањето на вашиот Apple или Android уред нема да трае повеќе од 30 секунди. Доколку не сакате да ги одвоте рацете од управувачот витруелниот асистент е секогаш на располагање, со повикување ,,Hey Chery“. Изненадува неговото препознавање на глас, брзина на реакција и можност за управување со посложени функции… систем кој е еден од ретките што сме ги користеле, а не затаил во некоја команда!
Максимален комфор
Возачот и патниците целосно уживаат во сите опции за комфор и удобност, како што е акустиката на Sony со 8 звучници, амбиентално осветлување во повеќе нијанси… Па така Chery FX со должина од 4.400 мм. ширина од 1.830 мм и висина од 1588 мм. нуди дарежлив внатрешен простор. И не само на предните седишта, туку и на задниот дел каде возрасни лица со висина од 180 см ќе имаат доволно простор за нозете и соодветен простор за главата зад возач со иста висина. Багажникот е со зафатнина од окулу 380 литри, што е просечно за сегментот и доволно за едно четиричлено семејство. Долколку е потребно да транспортирате погабаритни предменти, неговиот волумен може да се зголеми до 1.026 литри со преклопени задни седишта.
Компанијата Chery кај своите модели нуди само една моторна опција, истата онаа која неодамна имавме можност да ја возиме во моделот Tiggo 8 Pro. Станува збор за 4 цилиндричен турбо бензински мотор кој од 1.6 литарска зафатнина испорачува излезна моќност од 186 КС при 5.500 вртежи во минута и солидни 275 Нм влечна сила во опсег од 2.000 вртежи во минута и 4.400 врт/мин. Моторот е поврзан со седумстепен автоматски менувач (7DCT), производ на Getrag со двојна спојка што ја испраќа силата на предните тркала. Во склоп со него работат и трите режими за возење „нормал“, „еко“ и „спорт“ достапни да обезбедат непречено задоволство во секоја прилика.
Идеален партнер
За забрзување до 100 км/ч потребни се солидни 7,8 секунди, а максималната брзина е округли 206 км/ч. За секои 100 изминати километри на FX му потребни 8.2 литри гориво, што е податок кој често се сретнува и кај конкуренцијата. Возните карактеристики се далеку подинамични од колку кај Tiggo 8 Pro, што е разбирливо ако се земат во предвид габаритите, пониската поставеност од коловозот и тежината на моделот FX. Да нема забуни, тука не зборуваме за спортист, но доколку се вози во спортски мод знае навистина да „потегне“.
Зад управувачот делува доста спретно и дозволува динамично темпо. Свиоците не преставуваат проблем, благодарение на потврдиот „сетинг“ на суспензијата. На отворен пат пак делува доста сталожен и смирен, што го прави идеален сопатник и на подолги релации. Добрата изолација на кабината ја дополнува целокупната рафинираност на возилото. На сето тоа треба да се додат и низа напредни системи за помош (ADAS) кои се грижат за максимална безбедност на возачот и сопатниците.
Во Chery истакнуваат дека моделот FX е олицетворение на иднината што допрва треба да ја лансира компанијата во нова димензија. Ние би додале дека е одличен избор за оние кои бараат автомобил полн со стил, комфор и технологија. Неговата надворешност и ентериер се производ на модерните текови што го прави особено привлечен, додека напредните технологии и перформансите го ставаат во фокусот на современите возачи.
Технички податоци за Chery FX Noble Color
Цена на тестираниот модел: 33.400 евра
| Мотор | Euro VI, бензин, четиритактен, четирицилиндерски, водено ладен, сместен напред надолжно |
| работна зафатнина | 1.598 см3 |
| пречник и од | 77,0 x 85,8 мм |
| степен на компресија | –,-:- |
| Напојување | две брегасти оски во главата, четири вентили по цилиндар со варијабилни фази на работа, директно вбризгување на горивото, компресор, интеркулер |
| максимална моќ | 186 KС (136,5 kW) при 5.500 min/-1 |
| макс. вртежен момент | 275 Нм при 2.000 – 4.000 min-1 |
| Трансмисија | на предни тркала преку 7-степен автоматски менувач |
| Потпирање | напред мекферсонови нозе, независни попречни рамења, стабилизатор, назад мултилинк, спирални пружини, телескопски амортизери |
| Сопирачки | напред самовентилирачки дискови, назад дискови, ABS, EBD, ЕЅР, ТСЅ |
| Пневматици | 215/55 R18 (напред) 215/55 R18 (позади) |
| Каросерија | SUV со пет врати, пет седишта |
| должина х ширина х висина | 4.400 x 1.830 x 1.588 мм |
| меѓуоскино растојание | 2.630 мм |
| траги (напред/назад ) | —-/—- мм |
| Тежина | 1.444 кг |
| максимална тежина | -.— кг |
| Багажник | 378 литри |
| Резервоар | 50 литри |
| максимална брзина | 206 км/ч |
| забрзување 0-100 km/h | 7.8 секунди |
| потрошувачка (просек) | 7,1 л/100 км |
| емисија на CO2 | — г/км |
Chery FX во Македонија
| Chery FX Comfort | 29.500 евра |
| Chery FX Noble | 32.900 евра |
| Chery FX Noble Color | 33.400 евра |
Повеќе информации во Гранд Ауто на тел. (02) 30 73 103
Конкуренти:
| Hyundai Kona | од 29.900 до 43.300 евра |
| Nissan Juke | од 25.490 до 40.800 евра |
| Toyota C-HR | од 29.350 до 34.790 евра |
| Mazda CX-30 | од 26.480 до 41.830 евра |
ИЗВОР: https://avtoplus.mk/test-chery-fx-liceto-na-idninata/
